Il-proġett Għidha bil-Malti beda fl-2017 bħala paġna żgħira fuq Facebook u huwa frott l-idea taʼ żewġ aħwa, Reuben u Audrienne Degiorgio. It-tnejn li huma għandhom għal qalbhom l-ilsien Malti u ħassew il-ħtieġa li jqajmu iżjed interess fl-ilsien Malti, sabiex irawmu aktar imħabba u sens taʼ apprezzament lejh u nkunu kburin bil-wirt lingwistiku tagħna. Il-Malti lsien żgħir iżda fih dinja kbira xʼtiskopri! It-tagħrif li qed jinqasam magħkom fuq dan is-sit web jitwasslilkom permezz taʼ noti qosra dwar ir-regoli tal-kitba, il-verbi, il-qwiel, l-idjomi, termini, żbalji komuni, eċċ. li jkunu ttellgħu fuq il-media soċjali ta' Għidha bil-Malti (fuq Facebook, Instagram, Threads u TikTok). Dan is-sit web inbena sabiex dawn in-noti ma jintilfux biż-żmien u jkunu faċilment aċċessibbli fʼpost ieħor fuq l-internet. Bʼmod speċjali fuq il-media soċjali taʼ Għidha bil-Malti, issibu wkoll diversi osservazzjonijiet dwar l-influwenza tal-lingwi barranin fuq il-Malti (speċjalment l-Ingliż), il-code-switching, eċċ. Għalissa, ir-reels għadhom ma ttellgħux fuq dan is-sit web.

Reuben qed ikompli jaħdem fuq Għidha bil-Malti, u biż-żmien ħarġu wkoll fergħat oħrajn bħal verb.mt (konjugatur tal-verbi elettroniku, sħiħ, bla ħlas u li tistaʼ toqgħod għalkollox fuqu) u qawl.mt (ġabra estensiva taʼ qwiel Maltin imfissrin). Inġabret ukoll lista tʼismijiet Maltin għal dawk il-ġenituri li jitħajru jsemmu lil uliedhom bil-Malti, kif ukoll lista taʼ ismijiet tal-lokalitajiet fʼMalta u Għawdex bl-aġġettivi tal-abitanti fil-maskil, il-femminil u l-plural. Dawn ir-referenzi kollha ġew sponsorjati mill-Aġenzija Nazzjonali tal-Litteriżmu.

Ħarġu diversi artikli dwar Għidha bil-Malti, fosthom Saying it in Maltese: Siblings on a mission to make you say it right li deher fil-Malta Independent, Għidha bil-Malti li deher fis-17-il ħarġa tar-rivista l-aċċent tad-Dipartiment tal-Malti tal-Kummissjoni Ewropea u Wondering where the għ goes in a Maltese verb? New website to the rescue li deher fit-Times of Malta.